| Dilaw
na liwanag
sa kanya’y sumalubong.
Mga mata ng baliw –
pinukaw, ginising
ng bulong ng sinag
ni Amang Araw.
Mainit na liwanag,
nag-aapoy, nagliliyab –
sinusunog ang mga bangkay
at rosas
sa hukay ng kanyang utak.
Asul
na langit
na kanyang nilipad.
Malaya ang baliw –
nagpupumilit, nagpupumiglas
ang mga pakpak
ng kanyang isip
na parang paru-parong inabot ang ulap
mahaplos lang
ang kamay ni Bathala.
Pulang
dugo
at pulsong maselan –
nag-aabang, nananabik
sa alindog at halik
ng matalas na patalim.
Hinihintay ang dalaw
ng Dakilang Katapusan
at ang pangako
ng isang bulaklak.
Itim
na paligid, at ilaw ng buwan –
Matang nagmamasid
sa daang nilakad,
at musika’y ungol ng aso
at pagaspas ng dahon
sa gabing malamig.
Humayo ang baliw nang akoy hanapin,
at nakita ko sya
sa aking salamin. |
